ތިމަރަފުށީ ކައުންސިލުން ޢީދުލް އަޟްޙާ ފާހަގަކުރުމުގެ ގޮތުން ކުޑަކުދިންގެ ޢީދު ކާނިވަލްއެއް ކާމިޔާބުކަމާއެކު ބާއްވައިފިއެވެ. މި ކާނިވަލުން ރަށުގެ ކުޑަކުދިންނާއި ޢާއިލާތަކަށް އުފާވެރިކަމާއި ފޮނިމީރުކަން ގެނެސްދިނެވެ. ރަށުގެ ދެކުނު އަވަށުގައިވާ ކުރީގެ ފުޓްބޯޅަ ދަނޑުގައި ބޭއްވުނު މި ހަރަކާތުގައި ގިނަ އަދަދެއްގެ ރައްޔިތުން ބައިވެރިވިއެވެ. އަދި ކުޑަކުދިންނަށް އެކި ބާވަތުގެ މަޖާ ހަރަކާތްތަކުގައި ބައިވެރިވުމުގެ ފުރުޞަތު ލިބުނެވެ.

މިގޮތުން މި އިވެންޓްގައި ކުރިޔަށްދިޔަ ހަފްލާތަކުގެ ތެރޭގައި ޓޯއީ ކާރު ރޭހާއި ގެސިންގ ގޭމެއް ކަމައްވާ "ރެއިންބޯ ފުޅި ރޭސް" ފަދަ ފޯރިގަދަ ރޭސްތަކުން ފެށިގެން "ފޭސް ޕެއިންޓް" ކުރުމާއި ފޮޓޯ ބޫތު ފަދަ އުފެއްދުންތެރި ސްޓޭޝަންތަކާ ހަމައަށް، މި ކާނިވަލްގައި ކޮންމެ ކުއްޖަކަށްވެސް ބައިވެރިވެވޭނެ ހަރަކާތްތައް ހަމަޖެހިފައިހުއްޓެވެ. މީގެ އިތުރުން ވާދެމުމާއި "ފްރޮގް ޖަމްޕް" ފަދަ ކުޅިވަރުތަކުން ކުޑަކުދިން ޖިސްމާނީ ދުޅަހެޔޮކަން އިތުރުކޮށްދިންއިރު، ޓްރެމްޕޮލިންއާއި، "ކޭން ޝޫޓިންގ" ފަދަ ޒަމާނީ މަޖާ ހަރަކާތްތަކުން ކުދިންގެ ހިތްތަކުގައި އުފާވެރިކަން އާލާކޮށްދިނެވެ. ޑައިނޯ ބިސް ހޯދުމާއި "ފީޑް ދަ ހަންގްރީ ލަޔަން" ވީ އެންމެ މަޤްބޫލު ހަރަކާތްތަކުގެ ތެރެއިން ހަރަކާތްތަކެވެ. އަދި މި ހަރަކާތްތަކުގައި ކުދިން ވަރަށް ޝައުޤުވެރިކަމާއެކު ބައިވެރިވެ އިނާމުތައް ހޯދިއެވެ. މީގެ އިތުރުން ރަށުގެ އެހެނިހެން މުވައްސަސާތަކުން، ހާއްސަކޮށް ތިމަރަފުށީ ޕޮލިހާއި، ތިމަރަފުށީ ހެލްތްސެންޓަރުގެ މުވައްޒަފުން މި އިވެންޓްގައި ބައިވެރިވެ ހަރަކާތްތެރިވިއެވެ.

ކައުންސިލްގެ ރައީސް އިސްމާޢީލް އިބްރާހީމް މި ހަރަކާތުގެ ކާމިޔާބީއާމެދު އުފާފާޅުކުރައްވަމުން ވިދާޅުވީ، "މި ކާނިވަލްއަކީ އަޅުގަނޑުމެންގެ ތިމަރަފުށީގެ މުޖުތަމަޢުގެ ރޫޙާއި އެއްބައިވަންތަކަމުގެ ހަޤީޤީ ހެއްކެއް" ކަމަށެވެ. އަދި މީގެ އިތުރަށް ކައުންސިލްގެ ރައީސް މި ހަރަކާތުގެ ސަބަބުން ކުޑަކުދިނަށް ގެނުވި ހިނިތުންވުމާއި އުފާވެރިކަން ފެނުމުން،  ކުރެވުނު މަސައްކަތާއިމެދު ފުރިހަމައަށް ހިތްހަމަޖެހުނުކަމަށް ވިދާޅުވިއެވެ. އަދި މީގެ އިތުރުން މި ހަރަކާތް މިހާ ފުރިހަމަކަމާއި ކާމިޔާބުކަމާއިއެކު ގެންގޮސްދެވުނީ ތިމަރަފުށީ ކައުންސިލް އިދާރީ މުވައްޒަފުންގެ ގިނަގުނަ ބުރަ މަސައްކަތުންކަން ކައުންސިލްގެ ރައީސް ފާހަގަކުރެއްވިއެވެ.